Carta informativa sobre a enquisa das linguas aos pais e nais do CEIP A Rúa

PROFESORES E PROFESORAS DO CEIP A RÚA, ANTE O PROCEDEMENTO ABERTO POLA CONSELLERÍA DE EDUCACIÓN E ORDENACIÓN UNIVERSITARIA DE CONSULTA AOS PAIS E NAIS DO ALUMNADO DOS COLEXIOS PÚBLICOS E CONCERTADOS SOBRE O ENSINO DAS LINGUAS, QUEREMOS MANIFESTAR O SEGUINTE:

1º A lingua é o patrimonio cultural e histórico de máis valor e compétenos a todas e todos a súa defensa e promoción.

2º O Plan Xeral de Normalización da Lingua Galega foi aprobado por unanimidade de todas as forzas políticas con representación no Parlamento Galego no 2004 (PP, PSOE e BNG), é un punto de encontro na definición dos obxectivos para o ámbito educativo. O actual Decreto en vigor (124/2007, de 28 de xuño) pretende garantir unha competencia similar en Galego e en castelán.

3º Os centros de ensino levamos moito tempo traballando para que a aprendizaxe e o uso das linguas se desenvolva nun clima de convivencia que favoreza a adquisición da competencia lingüística plena nas dúas linguas oficiais da nosa comunidade ó rematar o ensino obrigatorio.
Todos os estudos ao respecto indican que o dominio de ambas linguas facilita a aprendizaxe doutras novas, e nunca ao contrario.

4º En concreto no CEIP A Rúa levamos moitos anos cun plan de Normalización Lingüística, ensinando en galego e tamén en castelá e dende logo nunca observamos nin sequera en alumnado procedente do estranxeiro, ningún problema de adaptación porque a lingua fose galego ou castelá.

5º Facer unha consulta a pais e nais, sen aclarar para qué se fai, pode levar a crear falsas expectativas, pensando que vai a haber un"ensino á carta", e nada máis lonxe da realidade.

6º O procedemento establecido pola Consellería para realizar a consulta está cheo de irregularidades, que farán pouco fiables os seus resultados:

• Acaso un/a neno/a de 3 anos pode ser responsable de levar e traer unha enquisa?
• Quen garante que a enquisa foi cumprimentada polo pai ou nai?
• Quen vai tabular os datos, en presenza de quen?
• Por que se lle esixe ós directores/as tomar os datos dos nenos/as que entregan a enquisa? Isto non vulnera a Lei de protección de datos?
• Que seguridade pode ter un pai ou nai que as súas opinións vaian ser lidas por alguén? Quen vai tabular os datos, en presenza de quen?...
• Por que unha familia que ten tres fillos terá tres votos e a que ten un único fillo/a só un voto?
• Por que poden opinar familias que para o próximo curso xa non terán fillos no ensino obrigatorio?
• Por que os que terán fillos en Infantil-3 anos para o próximo curso, non poden opinar?
• E os dos cursos vindeiros?
• As preguntas sobre a elección de idioma soamente se refiren ás que chaman materias troncais, (Coñecemento do Medio, Matemáticas e Educación para a Cidadanía) e nas demais a lingua non importa?
• Por certo, desde cando a Educación para a Cidadanía se considera unha materia troncal? Unha materia que pretenderon eliminar directamente do currículo pasa a convertirse en troncal dun día para outro?

7º. Estamos diante dunha enquisa tendenciosa que impide expresar a vontade dos que están a favor do ensino en galego.
Lembremos que a súa proposta máxima é que se imparta como moito o 50% do ensino en galego, mentres que podería impartirse en castelán a práctica totalidade das materias salvo as de lingua galega e inglesa.

8º Por último, resulta contraditorio que se nos estea anunciando recortes na calidade do ensino (supresión de prazas, agrupamentos, retirada de axudas para formación...) coa escusa da crise e se leve a cabo na distribución desta enquisa un gasto desmesurado de recursos económicos estimado arredor dos 300.000 euros.

Cangas, a 16 de xuño 2009

Profesores e profesoras do CEIP A Rúa